山東青島十里梨雪

上次提過關於櫻花嘅故事，因為春天到喇，响網上見到唔少開花嘅美景，包括香港一啲地方有櫻花開。而阿史最近就見到一段報道，話山東青島開始有開花美景睇。

响青島市呢個地方，以往係以梨樹聞名，响每年春季就會出現梨花花海嘅美景，當中最出名就係一個叫登瀛嘅小地方，呢個地方係响嶗山區一處，當地居民因為生計而種咗好多梨樹，所以就造就梨花美景。响1936年仲成為「青島十大勝景」之一，當年報紙係咁形容：「春天梨花盛開，十里似雪；秋則果實累累，行在其中，恍如洞府桃源，遊人如織。」登瀛梨雪亦成為老一輩青島人嘅回憶。其實除咗青島，青島市周邊地區都有村落種梨樹，所以都睇到梨雪盛放。

講到青島嘅梨雪，應該就會有史友諗起19年前由林嘉欣鄭伊健劉曄主演嘅《戀之風景》，林嘉欣响戲中要搵嘅戀之風景就係登瀛梨雪。